ព្រៃវែង៖ នៅព្រឹកថ្ងៃទី ១៣ ខែតុលា ឆ្នាំ២០២៣ ត្រូវនឹងវេនទី ១៤ នៃពិធីបុណ្យកាន់បិណ្ឌ និងភ្ជុំបិណ្ឌ រដ្ឋបាលខេត្តព្រៃវែងដឹកនាំដោយឯកឧត្តម សួន សុម៉ាលីន អភិបាលខេត្តព្រៃវែង រួមជាមួយនឹងលោក លោកស្រីអភិបាលរងខេត្ត មន្ទីរអង្គភាពជុំវិញខេត្ត អញ្ជើញចូលរួមកាន់បិណ្ឌវេនទី ១៤ នៅក្នុងវត្តសំសមីស្ថិតនៅ ក្រុងព្រៃវែង ខេត្តព្រៃវែង។
ពិធីបុណ្យកាន់បិណ្ឌ និងភ្ជុំបិណ្ឌ គឺជាពិធីបុណ្យមួយដ៏ធំក្នុងចំណោមពិធីបុណ្យធំៗដ៏ទៃទៀតក្នុងព្រះពុទ្ធសាសនា ក៏ដូចជាបងប្អូនពុទ្ធសាសនិក ដែលកាន់ព្រះពុទ្ធសាសនា ប្ររព្ធធ្វើនៅក្នុងព្រះរាជាណាចក្រកម្ពុជា ដោយមានរយៈពេល ១៥ ថ្ងៃ គឺចាប់ពីថ្ងៃទី ១ រោច ខែភទ្របទ រហូតដល់ថ្ងៃ ១៥ រោច ខែភទ្របទ ដែលជាថ្ងៃភ្ជុំធំ បងប្អូនប្រជាពលរដ្ឋបានមកជូបជុំគ្នានៅតាមទីវត្តអារាមនានាក្នុងព្រះរាជាណាចក្រកម្ពុជា ដើម្បីធ្វើបុណ្យទាន ឧទ្ទិសកុសលផលបុណ្យ ដល់បុព្វការីជនមានមាតាបិតាគ្រូឧបជ្ឈាយាចា ញាតិកាទាំងប្រាំពីរសន្ដាន ដែលទម្លុះកាយទម្លាយខណ្ឌទៅកាន់បរលោកនោះ ដើម្បីទទួលបាននូវកុសលផលបុណ្យដែលខ្លួនបានធ្វើនៅក្នុងឱកាសនៃពិធីបុណ្យកាន់បិណ្ឌ និងភ្ជុំបិណ្ឌនេះ។
នៅក្នុងឱកាសនៃពិធីកាន់បិណ្ឌវេនទី ១៤ នេះផងដែរឯកឧត្តម អភិបាលខេត្ត ក៏សូមឧទ្ទិសកុសលផលបុណ្យដល់ដួងវិញ្ញាណក្ខន្ធបុព្វការីជនមានមាតាបិតាគ្រូឧបជ្ឈាយាចា ព្រមទាំងយុទ្ធជន យុទ្ធនារី ដែលបានបូជាជីវិតបូជាសាច់ស្រស់ ឈាមស្រស់ដើម្បីការពារប្រទេសជាតិ រហុតទទូលបានសុខសន្តិភាពពេញផ្ទៃប្រទេស សូមទទូល មផល កុសលផលបុណ្យ ដែលឯកឧត្តម បានធ្វើនៅក្នុងថ្ងៃនេះសូមឲ្យរួចចាកទុក្ខទោសទាំងពួង។
ក្នុងនោះដែរឯកឧត្តម អភិបាលខេត្ត បាននាំយកទេយ្យទានប្រគេនព្រះសង្ឃមាន៖ អង្ករ ៧បាវ ស្មើនឹង៣០០ គីឡូក្រាម, ទឹកសុទ្ធអរុណា 10 កេស, ភេសជ្ជៈ M-១៥០ ១០ កកេស, ភេសជ្ជៈ V active ១០ កេស, ទឹកត្រី ១០ យូរ, ទឹកស៊ីអ៊ីវ ១០ យួរ, ត្រីខ ៥ កេសធំ, មីម៉ាម៉ា ៥ កេសធំ, តែ២ បេ, ទឹកដោះគោខាប់ ២ កេសធំ, អំបិល ២ បេ, ស្លាដក់ ៧ ប្រអប់, ផ្លែឈើ ៧ កន្ត្រក់, បច្ច័យកសាងវត្តចំនួន ១៣ លាន ៣០ ម៉ឺនរៀនផងដែរ៕