ក្នុងឱកាសចុះពិនិត្យការអនុវត្តបំរាមគោចរក្នុងភូមិសាស្រ្តរាជធានីភ្នំពេញកាលពីយប់មិញ លោក ឃួង ស្រេង អភិបាលរាជធានីភ្នំពេញបានប្រកាសចាត់វិធានការពិន័យធ្ងន់ធ្ងរបំផុតដោយមិនអាចលើកលែង ចំពោះអ្នកល្មើសនឹងបំរាមគោចរដែលបានដាក់ចេញដោយអាជ្ញាធរ ដើម្បីទប់ស្កាត់ការឆ្លងរាលដាលជំងឺកូវីដ១៩។
លោក ឃួង ស្រេង បានបញ្ជាក់ថា ការអនុវត្តនូវវិធានការ ដោយបិទបំរាមគោចរខាងលើនេះ ធ្វើឡើងក្នុងគោលបំណងដើម្បីទប់ស្កាត់ឲ្យបាននូវការរីករាលដាលជំងឺកូវីដ-១៩ ពិសេសកូវីដ បំលែងថ្មីដែលតា ។ លោកបន្តថា ដោយគិតពីសុខភាពនិងអាយុជីវិតបងប្អូនប្រជាពលរដ្ឋប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានចេញសេចក្តីសម្រេច បិទខ្ទប់ខេត្តចំនួន៨រួចហើយ ដើម្បីកុំឲ្យមានការរីករាលដាលនៃជំងឺកូវីដបំលែងថ្មីនេះ។ ទន្ទឹមនឹងនេះ រដ្ឋបាលរាជធានីភ្នំពេញក៏បានសម្រេចបិទបំរាមគោចរចាប់ពីម៉ោង ០៩យប់ដល់ម៉ោង៣ភ្លឺផងដែរ ដើម្បីរក្សាអាយុជីវិតបងប្អូនប្រជាពលរដ្ឋខណៈដែលជំងឺនេះបាននិងកំពុងរីករាលដល់យ៉ាងខ្លាំង គួរឲ្យព្រួយបារម្ភ។
លោកឃួង ស្រេង ក៏បានបញ្ជាក់ថា ចំពោះបងប្អូនប្រជាពលរដ្ឋដែលល្មើសនឹងបម្រាមនេះនឹងត្រូវផាកពិន័យយ៉ាងធ្ងន់ធ្ងរបំផុត ដោយសម្រាប់ម៉ូតូ គឺត្រូវផាកពិន័យចំនួន២០ម៉ឺនរៀល ។ ចំណែកឯរថយន្តត្រូវផាកពិន័យចំនួន១ លានរៀល ហើយគោលដៅដែលដាក់ត្រួតពិនិត្យក្នុង១ខណ្ឌៗ មានចំនួន២គោលដៅសរុប១៤ខណ្ឌស្មើនឹង២៨គោលដៅ ។ ប៉ុន្តែអាចមានចំនួនលើសពីនេះ ដោយខណ្ឌនីមួយៗ មានបន្ថែមបន្ថែមគោលដៅទៀត។គួរបញ្ជាក់ថា អាជ្ញាធររាជធានីភ្នំពេញកាលពីថ្ងៃទី២៩ ខែកក្កដា បានដាក់ចេញនូវវិធានការរដ្ឋបាលដើម្បីទប់ស្កាត់ការឆ្លងរាលដាល នៃជំងឺកូវីដ១៩ ដោយក្នុងនោះ ក៏មានការដាក់បំរាមគោចរ ពីម៉ោង៩យប់ ដល់ម៉ោង៣ភ្លឺ ចាប់ផ្តើមពីថ្ងៃទី៣០ ខែកក្កដា រហូតដល់ថ្ងៃទី១២ ខែកក្កដា ឆ្នាំ២០២១៕
