មេឈ្មួញឈ្មោះ ណុប ឌី ហៅឆើត នៅតែធ្វើសកម្មភាពប្រមូលទិញឈើក្នុងឃុំត្រពាំងជោរ ស្រុកឱរ៉ាល់ យ៉ាងគឃ្លើប្រភពពីប្រជាពលរដ្ឋក្នុងភូមិសំរោង ឃុំត្រពាំងជោរ ស្រុកឱរ៉ាល់ បានឲ្យដឹងថា រហូតដល់ល្ងាចថ្ងៃទី០៥ ខែមីនា ម្សិលមិញនេះបក្ខពួករបស់មេឈ្មួញឈ្មោះ ណុប ឌី ហៅឆើត នៅតែបន្តសកម្មភាពប្រមូលទិញឈើឈ្លីក នៅចំណុចប៉ុយរ៉ុយ ភូមិសំរោង យ៉ាងគឃ្លើនដដែល។ ដោយហេតុថា មន្ត្រីរដ្ឋបាលព្រៃឈើ សមត្ថកិច្ចអាវុធហត្ថនិងមន្ត្រីបរិស្ថាន ក្នុងស្រុកឱរ៉ាល់ មិនហ៊ានប៉ះពាល់មេឈ្មួញឈ្មោះ ណុប ឌី ហៅឆើត នោះទេ ព្រោះអីឈ្មួញម្នាក់នេះមានខ្នងបង្អែករឹងមាំ។
ប្រភពស្និទ្ធនឹងមេឈ្មួញឈ្មោះ ណុប ឌី ហៅឆើត បានឲ្យដឹងថា សូម្បីតែលោក ជូ សារុន មេបញ្ជាការកងរាជអាវុធហត្ថខេត្តកំពង់ស្ពឺ ក៏មិនហ៊ានប៉ះពាល់មេឈ្មួញរូបនេះដែរ មិនដឹងថាមានជាប់ពាក់ព័ន្ធផលប្រយោជន៍យ៉ាងណានោះឡើយ។ ដូច្នេះហើយទើបមេឈ្មួញឈ្មោះ ណុប ឌី ហៅឆើត ព្រមទាំងបក្ខពួកនៅតែអាចធ្វើសកម្មភាពប្រមូលទិញឈើនៅភូមិសំរោង ឃុំត្រពាំងជោរ ហើយដឹកជញ្ជូនចូលទៅទីរួមស្រុកឱរ៉ាល់ នៅវេលាទៀបភ្លឺ។ បើនិយាយពីប្រធានមន្ទីរកសិកម្មខេត្តកំពង់ស្ពឺ លោក ឈៀង តុលា និងមេរដ្ឋបាលព្រៃឈើខេត្តកំពង់ស្ពឺ មិនដែលចាត់វិធានការបង្ក្រាបមេឈ្មួញឈ្មោះ ណុប ឌី ហៅឆើត ទាល់តែសោះ។
បើតាមការបង្ហើបពីប្រភពខ្លះ បានឲ្យដឹងថា មន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័នក្នុងខេត្តកំពង់ស្ពឺ សម្ងំទទួលផលប្រយោជន៍ពីមេឈ្មួញឈ្មោះ ណុប ឌី ហៅឆើត ទើបឈ្មួញម្នាក់នេះហ៊ានបន្តប្រព្រឹត្តបទល្មើសព្រៃឈើយ៉ាងងងើល។ ប្រការនេះកំពុងធ្វើឲ្យបទបញ្ជារបស់លោក វ៉ី សំណាង អភិបាលខេត្តកំពង់ស្ពឺ ក្នុងការបង្ក្រាបបទល្មើសព្រៃឈើក្នុងស្រុកឱរ៉ាល់ ស្រុកភ្នំស្រួច និងស្រុកថ្ពង ក្លាយជារឿងឥតន័យ។ ដោយហេតុថា បច្បុប្បន្នមេឈ្មួញឈ្មោះ ណុប ឌី ហៅឆើត នៅតែធ្វើសកម្មភាពប្រមូលទិញឈើនៅឃុំត្រពាំងជោរ ដឹកជញ្ជូនចូលទីរួមស្រុកឱរ៉ាល់ ហើយដឹកជញ្ជូនចេញទៅខេត្តព្រះសីហនុ និងដឹកជញ្ជូនចេញទៅស្រុកយួនតាមអំពើចិត្តដដែល៕