ឯកឧ្តមស៊ុន ចាន់ថុល និងលោក ឃីម សុខហេង បានណែនាំសិស្សានុសិស្សាថ្នាក់ទី១២ និងសាធារណជន សរុបប្រមាណ៤៥០នាក់ មកស្វែងយល់នូវមុខជំនាញ និងកម្មវិធីសិក្សារបស់វិទ្យាស្ថានតេជោ សែន សាធារណការ និងដឹកជញ្ជូន ក្នុងកម្មវិធីតម្រង់ទិសជំនាញសិក្សា និងការងាររបស់វិទ្យាស្ថានតេជោសែន សាធារណការ និងដឹកជញ្ចូន

ថ្ងៃអាទិត្យ ១០កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២១ ខែកុម្ភៈ ឆ្នាំ២០២០ នៅទីស្តីការក្រសួង ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីតម្រង់ទិសជំនាញសិក្សា និងការងាររបស់វិទ្យាស្ថានតេជោសែន សាធារណការ និងដឹកជញ្ចូន ដោយមានការចូលរួមពីថ្នាក់ដឹកនាំក្រសួង លោកគ្រូ អ្នកគ្រូ សិស្សានុ សិស្សាថ្នាក់ទី១២ មកពីវិទ្យាល័យនានាក្នុងរាជធានីភ្នំពេញ និងបងប្អូនសាធារណជនសរុបទាំងអស់ប្រមាណ៤៥០នាក់ ដោយបានធ្វើការអង្គុយរក្សាគំលាត និងអនុវត្តតាមគោលការណ៍ណែនាំរបស់ក្រសួងសុខាភិបាល។
កម្មវិធីនេះរៀបចំឡើងក្នុងគោលបំណង ដើម្បីផ្សព្វផ្សាយ ក៏ដូចជាបង្ហាញជូនលោកគ្រូ អ្នកគ្រូ និងសិស្សា នុសិស្សាថ្នាក់ទី១២ និងបងប្អូនសាធារណជនដែលចាប់អារម្មណ៍ឱ្យបានដឹងអំពីមុខជំនាញ និងកម្មវិធី សិក្សារបស់វិទ្យាស្ថានតេជោ សែន សាធារណការ និងដឹកជញ្ជូន ដែលផ្តល់ជូនសម្រាប់ឆ្នាំសិក្សាថ្មីរបស់ខ្លួន និងឱកាសការងារផ្សេងៗនៅក្នុងក្រសួងសាធារណការ និងដឹកជញ្ជូនបន្ទាប់ពីបានបញ្ចប់ការសិក្សា នៅក្នុងវិទ្យាស្ថាននេះ។

កម្មវិធីនេះមានការចូលរួមធ្វើបង្ហាញពីឯកឧត្តម យិត ប៊ុណ្ណា រដ្ឋលេខាធិការ ក្រសួងសាធារណការ និងដឹក ជញ្ជូន និងឯកឧត្តម វ៉ាស៊ីម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន អំពីជំនាញ និងតម្រូវការក្នុងវិស័យសាធារណការ និងដឹកជញ្ជូន និងការធ្វើបទបង្ហាញ ពីលោកគ្រូ ឃីម សុខហេង ស្ថានិក នៃវិទ្យាស្ថានសិក្សាដើម្បីជោគជ័យ អំពីការកំណត់គោលដៅ និងការជ្រើសរើសជំនាញសិក្សាផងដែរ។
គួរកត់សម្គាល់ផងដែរថា៖ ការបង្កើតឲ្យមានវិទ្យាស្ថានតេជោ សែន សាធារណការ និងដឹកជញ្ជូន គឺជាការ បើកទំព័រប្រវត្តិសាស្ត្រ ថ្មីមួយទៀតរបស់ក្រសួងសាធារណការ និងដឹកជញ្ជូនក្រោមគំនិតផ្តួចផ្តើមរបស់ឯក ឧត្តមទេសរដ្ឋមន្ត្រី ស៊ុន ចាន់ថុល ដែលបានគិតគូរពីចក្ខុវិស័យដ៏វែងឆ្ងាយក្នុងការជំរុញការអភិវឌ្ឍធនធាន មនុស្សដើម្បីឆ្លើយតបទៅនឹងការរីកចម្រើនលើវិស័យសាធារណការ និងដឹកជញ្ជូនក្នុងសម័យដ៏រុងរឿង ពោរពេញដោយសុខសន្តិភាព និងការអភិវឌ្ឍក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

វិទ្យាស្ថាននេះមានអគារចំនួនមួយខ្នង មានកម្ពស់៤ជាន់ បណ្តោយប្រវែង៧៤,៥ម៉ែត្រ និងទទឹងប្រវែង១៧ ម៉ែត្រ ក្រោមជំនួយពីក្រុមហ៊ុនសាជីវកម្មស្ពាន និងថ្នល់ចិន(CRBC)ក្នុងនោះ៖ មានបន្ទប់សិក្សាចំនួន២៤ បន្ទប់ ការិយាល័យរដ្ឋបាលចំនួន៣បន្ទប់ និងមន្ទីរពិសោធន៍ចំនួន១បន្ទប់ ដែលបានបំពាក់ និងត្រៀមបំពាក់សម្ភារសិក្សា និងឧបករណ៍បច្ចេកទេសទំនើបៗផងដែរ។
ជាងនេះទៅទៀត ដើម្បីប្រែក្លាយជាវិទ្យាស្ថានមួយដែលមានស្តង់ដា និងសមត្ថភាពខ្ពស់ ក្នុងការផ្តល់ជំនាញឯកទេស ប្រកបដោយគុណភាព វិទ្យាស្ថានតេជោ សែន សាធារណការ និងដឹកជញ្ជូន បានសហ ការជាមួយវិទ្យាស្ថានបច្ចេកវិទ្យាកម្ពុជា ដើម្បីផ្លាស់ប្ដូរបទពិសោធន៍ ចំណេះដឹង ជំនាញឯកទេស និងធនធានមនុស្សទៅវិញទៅមកក្នុងគោលដៅរួមគ្នាជំរុញលើកកម្ពស់ការអភិវឌ្ឍធនធានមនុស្សនិងធ្វើការចែក រំលែកចំណេះដឹងប្រកបដោយចីរភាពដល់សិស្សនិស្សិតនិងបញ្ញវន្តខ្មែរ។

សូមជម្រាបជូនថា៖ វិទ្យាស្ថានតេជោ សែន សាធារណការ និងដឹកជញ្ជូនថ្មីនេះ បានប្រកាសជ្រើសរើស និស្សិតជំនាន់ទី១ ដោយផ្តល់ជាអាហារូបករណ៍ក្នុងតម្លៃសិក្សា ៦០០ ដុល្លារអាមេរិកក្នុងមួយឆ្នាំ (បញ្ចុះថ្លៃ សិក្សាជូន៥០%សម្រាប់លើកទឹកចិត្តសិស្សនារី) ចំនួន៥០នាក់ប៉ុណ្ណោះ ដោយត្រូវឆ្លងកាត់ប្រឡងតេស្តសមត្ថភាពជាមុនសិន។ លក្ខខណ្ឌក្នុងការដាក់ពាក្យ៖បេក្ខជនបេក្ខនារីត្រូវមានសញ្ញាប័ត្រមធ្យមសិក្សាទុតិយភូមិ ឬសញ្ញាប័ត្រសមមូល (មានតម្លៃស្មើ)។
ថ្លែងទៅកាន់អង្គពិធីនាឱកាសនោះ ឯកឧត្តមទេសរដ្ឋមន្ត្រី បានគូសបញ្ជាក់អំពីសារសំខាន់នៃវិទ្យាស្ថាន តេជោសែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន ដែលអាចផ្តល់ការបណ្តុះបណ្តាលកូនខ្មែរឱ្យមានសមត្ថភាពអាចសាងសង់ហេដ្ឋារចនាសម្ព័ន្ធស្ពានថ្នល់ដោយខ្លួនឯងដោយមិនចាំបាច់ពឹងផ្អែកលើក្រុមហ៊ុនសាងសង់របស់បរទេស។

ជាមួយគ្នានោះផងដែរ ឯកឧត្តមទេសរដ្ឋមន្ត្រីបានផ្តាំផ្ញើនូវដំបូន្មានល្អៗដល់សិស្សានុសិស្សទាំងអស់ថា៖ ត្រូវចេះគ្រប់គ្រងជោគវាសនារបស់ខ្លួនដោយខ្លួនឯង កុំឱ្យអ្នកដទៃគេមកគ្រប់គ្រងជំនួសខ្លួន ត្រូវកំណត់គោលដៅជីវិតរបស់ខ្លួនឱ្យបានច្បាស់លាស់ដើម្បីអភិវឌ្ឍសមត្ថភាពរបស់ខ្លួនឱ្យមានកម្រិតវិជ្ជាជីវៈប្រកបដោយសក្កានុពល ដែលអាចចូលរួមចំណែកក្នុងការកសាងហេដ្ឋារចនាសម្ព័ន្ធរបស់យើងឱ្យកាន់តែមាន ការរីកចម្រើនថែមទៀត។
ឯកឧត្តមទេសរដ្ឋមន្ត្រីបានសម្ដែងនូវការប្ដេជ្ញាចិត្តយ៉ាងមុតមាំថានឹងជួយជំរុញសិស្សនិស្សិតដែលបានបញ្ចប់ការសិក្សានៅក្នុងវិទ្យាស្ថាននេះឲ្យបានចុះទៅតាមការដ្ឋានសាងសង់នានាដោយផ្ទាល់ដើម្បីដកស្រង់បទពិសោធន៍ជាក់ស្តែង និងជួយរកការងារធ្វើនៅក្នុងវិស័យនេះដោយហេតុថាក្រសួងមានគម្រោងអភិវឌ្ឍហេដ្ឋារចនាសម្ព័ន្ធជាច្រើន ដែលទាមទារសមត្ថភាព និងធនធានមនុស្សប្រកបដោយគុណភាពខ្ពស់យ៉ាងពិតប្រាកដ។

ឯកឧត្តមទេសរដ្ឋមន្ត្រី បានសម្តែងនូវការកោតសរសើរ និងមោទនភាពជាអនេកដែលបានឃើញសិស្សានុ សិស្សមកចូលរួមកម្មវិធីនេះយ៉ាងច្រើនកុះករ ដើម្បីស្វែងយល់កម្មវិធីសិក្សា ក៏ដូចជាជំនាញបច្ចេកទេសនៅ ក្នុងវិទ្យាស្ថាននេះ និងបានបន្ថែមទៀតថា៖ ក្មួយៗពិតជាធ្វើការសម្រេចចិត្តត្រឹមត្រូវសម្រាប់មាគាជីវិតរបស់ខ្លួន។
ជាទីបញ្ចប់ ឯកឧត្តមទេសរដ្ឋមន្ត្រី និងថ្នាក់ដឹកនាំក្រសួងបានដឹកនាំលោកគ្រូ អ្នកគ្រូ សិស្សានុសិស្សាថ្នាក់ទី១២ និងបងប្អូនសាធារណជនដែលបានអញ្ជើញចូលរួមក្នុងកម្មវិធីនេះទៅទស្សនាអាគាររដ្ឋបាល អគារវិទ្យាស្ថានតេជោ សែន សាធារណការ និងដឹកជញ្ចូន និងមន្ទីរពិសោធន៍ផងដែរ៕