ស្លាប់17និងរបួស24នាក់ករណីបាក់រលំអគារនៅខេត្តព្រះសីហនុ ខណៈក្រុមសង្រ្គោះនៅតែបន្តរុករក  Sun/23/June/2019/ដោយ/សហការី

ខេត្តព្រះសីហនុ ៖ គិតត្រឹមម៉ោង06និង30នាទីព្រឹកថ្ងៃអាទិត្យនេះ ចំនួនអ្នកស្លាប់កើនដល់17នាក់ និងអ្នករបួស24នាក់ ហើយបាននិងកំពុងត្រូវបានសង្គ្រោះនៅមន្ទីរពេទ្យ ក្នុងករណីបាក់រលំអគារនៅក្រុងព្រះសីហនុ ខេត្តព្រះសីហនុ។

ឧបទ្ទវហេតុរលំអគារនេះបានបណ្តាលឱ្យមនុស្សស្លាប់ និងរងរបួសចំនួន៤១រូបក្នុងនោះស្លាប់ចំនួន17នាក់ ហើយអ្នករងរបួសចំនួន24 រូប ខណៈដែលក្រុមកម្លាំងសង្គ្រោះបានបន្តធ្វើការរុករកជនរងគ្រោះដែលស្ថិតក្នុងឧបទ្ទវហេតុនៃការរលំបាក់អគារនេះ។ មានក្រុមគ្រួសារមួយចំនួនបានបំពេញបែបបទយកសពទៅធ្វើបុណ្យ៩នាក់រួចហើយ។​

ជាមួយគ្នានោះនៅរាត្រីថ្ងៃទី22ខែមិថុនា ឆ្នាំ2019នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសសម្រេចយកថវិកាជាតិជួយឧបត្ថម្ភដល់ជនរងគ្រោះក្នុងសោដនាកម្មបាក់អគារនៅខេត្តព្រះសីហនុ អ្នកស្លាប់ទទួលបាន40លានរៀល (មួយម៉ឺនដុល្លារ) និងអ្នករងរបួស5លានរៀល និងទទួលការព្យាបាលដោយឥតគិតថ្លៃ។

សម្តេចតេជោ ហ៊ុន សែន បានប្រកាសតាមរយៈ Facebook ជាមួយខ្លឹមសារយ៉ាងដូច្នេះថា៖ «បងប្អូនជនរួមជាតិជាទីគោរពស្រឡាញ់។ សោដនាដកម្មបាក់អគារនៅខេត្ត ព្រះសីហនុគឺជារឿងឈឺចាប់របស់ជាតិយើងពិសេសក្រុមគ្រួសារនៃអ្នកដែលបានបាត់បង់ជិវិតដែលជាភរិយា ឬស្វាមីឬកូនឬឪពុកម្តាយ។ល។ ដើម្បីចូលរួមមរណទុក្ខ និងជួយដល់ជីវភាពក្រុមគ្រួសារក្នុងនាម រាជរដ្ឋាភិបាលខ្ញុំសម្រេចបញ្ចេញថវិការជាតិជួយដល់ក្រុមគ្រួសារ អ្នកស្លាប់ក្នុងមួយនាក់៤០លានរៀល(សែសិបលានរៀល) ឬ1ម៉ឺនដុល្លា (10.000$)។ សម្រាប់អ្នកត្រូវរបួសទាំងអស់ត្រូវទទួលបានការព្យាបាលដោយឥតគិតថ្លៃនៅតាមមន្ទីរពេទ្យរដ្ឋ និងទទួលបានជំនួយក្នុងមួយនាក់ចំនួន5លានរៀល (ប្រាំលានរៀល)»។

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាក់ថា «ឯកឧត្តម ប៊ិន ឈិន ឧបនាយរដ្ឋមន្ត្រីប្រចាំការ និងជារដ្ឋមន្រ្តីទីស្តីការគណៈរដ្ឋមន្ត្រីទទួលចាត់ចែង ថវិកានេះជូនបងប្អូន។ យប់នេះខ្ញុំនៅបន្តតាមដានការងាររុករក និងសង្រ្គោះជាមួយបងប្អូនតទៅទៀត៕​