ប៉ោយប៉ែត÷ប្រភពព័ត៌មានពីប្រជាពលរដ្ឋនៅភូមិអូរនាង ក្រុងប៉ោយប៉ែត ខេត្តបន្ទាយមានជ័យ បានឲ្យដឹងថា នៅក្នុងមូលដ្ឋានពួកគាត់មានគេបើកសង្វៀនបញ្ជល់មាន់ និងវង់អាប៉ោងទ្រង់ទ្រាយធំ ដំណើរការយ៉ាងរលូនដោយមិនទាន់ឃើញសមត្ថកិច្ចចាត់វិធានការបង្ក្រាបនៅឡើយ។ ក្នុងមួយថ្ងៃៗមានអ្នកចូលរួមលេងល្បែងបញ្ជល់មាន់ និងវង់អាប៉ោងយ៉ាងគគ្រឹកគគ្រេង ហើយលោក សៅ សារឿន​ អធិការនគរបាលក្រុងប៉ោយប៉ែត និងលោក គាត ហ៊ុល អភិបាលក្រុងប៉ោយប៉ែត បានរក្សាភាពស្ងៀមស្ងាត់ធ្វើឲ្យប្រជាពលរដ្ឋព្រួយបារម្ភយ៉ាងខ្លាំងអំពីបញ្ហាអសន្តិសុខសង្គម។ ហេតុនេះហើយទើបប្រជាពលរដ្ឋអំពាវនាវឲ្យលោក សិទ្ធិ ឡោះ ស្នងការនគរបាលខេត្តបន្ទាយមានជ័យ ចាត់វិធានការបង្ក្រាបល្បែងស៊ីសងក្នុងក្រុងប៉ោយប៉ែត ជាបន្ទាន់។

ជុំវិញបញ្ហាខាងលើនេះប្រជាពលរដ្ឋសង្ស័យថា បើគ្មានការបើកដៃពីសំណាក់មន្រ្តីអាជ្ញាធរ និងសមត្ថកិច្ចមូលដ្ឋានទេនោះ គឺគ្មានអ្នកណាអាចបើកសង្វៀនបញ្ជល់មាន់ និងវង់អាប៉ោង នៅភូមិអូរនាង ក្រុងប៉ោយប៉ែត បានទេ។ ប្រជាពលរដ្ឋបានឲ្យដឹងថា សម្រាប់ការបញ្ជល់មាន់១គូៗមានដាក់ដើមទន់ពី500ដុល្លារ ទៅ1000ដុល្លារ ហើយល្បែងអាប៉ោងក៏ស៊ីសងលុយច្រើនៗដែរ ដោយមេល្បែងស៊ីសងអាចប្រមូលលុយបានយ៉ាងច្រើនជារៀងរាល់ថ្ងៃ។ អ្នកញៀនល្បែងភាគច្រើន ត្រូវបានចាញ់អស់លុយកាក់ទ្រព្យសម្បត្តិ រថយន្ត និងម៉ូតូជាដើម ហើយអំពើចោរកម្ម និងបទល្មើសផ្សេងៗនៅក្នុងក្រុងប៉ោយប៉ែត គឺជារឿងគួរឲ្យភ័យខ្លាច។

ប្រជាពលរដ្ឋបានរិះគន់ថា លោក សៅ​ សារឿន អធិការនគរបាលក្រុងប៉ោយប៉ែត និងលោក គាត ហ៊ុល អភិបាលក្រុងប៉ោយប៉ែត ហាក់ដូចជាមិនសូវយកចិត្តទុកដាក់ក្នុងការបង្ក្រាបល្បែងស៊ីសង ដើម្បីពង្រឹងសន្តិសុខសង្គមនោះឡើយ។ ជាក់ស្ដែងបច្ចុប្បន្នមានល្បែងបញ្ជល់មាន់ និងអាប៉ោង នៅក្នុងភូមិអូរនាង ក្រុងប៉ោយប៉ែត ដំណើរការយ៉ាងពេញបន្ទុក ហើយលោក សៅ​ សារឿន និងលោក គាត ហ៊ុល បែរជារក្សាភាពស្ងៀមស្ងាត់។ ដូច្នេះលោក សិទ្ធិ ឡោះ ស្នងការនគរបាលខេត្តបន្ទាយមានជ័យ និងលោក អ៊ុំ រាត្រី អភិបាលខេត្តបន្ទាយមានជ័យ គួរចាត់វិធានការបង្ក្រាបល្បែងស៊ីសងក្នុងក្រុងប៉ោយប៉ែត ឲ្យបានឆាប់ដើម្បីពង្រឹងសន្តិសុខសង្គម៕